Dei "Gesellschaft zur Förderung des Wossidlo-Archivs e. V." (GWA) will helpen, dei Sammlungen von Richard Wossidlo (1859-1939) tau bewohren un för dei Wissenschaft taugängig tau maken. Dat Wark von Richard Wossidlo sall mit Hülp von uns Verein grote Verbreitung finnen. Richard Wossidlo un siene välen Bidrägers un Helperslüüd hebben dei mäkelbörger Traditionen, dei Erinnerungen an dat dägliche Läben un uns nedderdütsche Sprak vör dat Vergäten bewohrt. Hüt is dat in dei Lannesverfatung, Artikel 16, Absatz 2, festmakt, dat dit Arw erhollen warden sall.

Dei GWA is ein gemeinnütziger Verein un arbeit't tauhopen mit

• dat Institut für Volkskunde (Wossidlo-Archiv) von dei Universität Rostock. Hier ward dei volkskundliche un sprakwissenschaftliche Deil von dei Sammlung Wossidlos upbewohrt.
• dat Mecklenburgische Volkskundemuseum/Freilichtmuseum in Schwerin-Mueß, dat ut dei Sachkultursammlung Wossidlos entstahn is,
• dat „Wossidlo-Haus“ in Walkendorf, dicht bi Friedrichshof, dat Dörp, wo Richard Wossidlo buren is,
• dei „Interessengemeinschaft Richard Wossidlo“ in Waren, wo Richard Wossidlo dei mihrste Tiet sienes Läbens läwt un arbeit't hett,
• mit dei Museen von dei Stadt Ribnitz-Damgarten, wo Richard Wossidlo siene letzte Rauh fünn,
• mit den „Arbeitskreis Wossidlo-Archiv“ von dei Seniorenakademie von dei Universität Rostock,
• mit Schaulen und anner Inrichtungen, dei den Namen Richard Wossidlos dragen (Waren und Ribnitz-Damgarten)
• mit plattdütsche Vereine un mäkelbörger Kulturvereine, dei dat Wark von Wossidlo plägen un erhollen.

Dormit bugt dei GWA 'ne wichtige Brügg twischen dei wissenschaftliche Forschung un dei Vereine dei ihrenamtlich dat Arw von Richard Wossidlo un dei plattdütsche Sprak plägen. 

Üm dit Vereinsziel ümtausetten, is dat Projekt „WossiDiA“ hüt un taukünftig sihr wichtig. Näben dit grote Vörhaben versäukt  dei GWA, dei volkskundliche Forschung un Pläg von dei beiden Landesdeile Mäkelbörg un Vörpommern tau fördern.