Projekte

WossiDiA (Wossidlo-Digitales-Archiv) is een Bidrag üm dat Läbenswark von Richard Wossidlo för spädere Tiden uptohägen un vör Schaden to bewohren.

Richard Wossidlo (1859-1939) wier´n Privatgelihrten un Gymnasialperfesser, mihrstendeils in Waren/Müritz. He hett sien Läben lang un mit Hülp von sien Bidrägers (dat wiern Lihrers, Pasturn, Gymnasialschölers, Handwarkslüüd, Gotsherrn, Huusfrugens un anner) oewer twei Millionen Zettels beschräben, de Breif von sien Hülpslüüd uphägt, un allens, wat em wichtig wier, upbewohrt.

Meisttid is he sülben in Meckelborg ünnerwägens wäst, is bi de Lüüd up ´ne Bänk sittengahn, hett ehr up´t Muul käken un dat, wat he hüürt hett, upschräben. Mit disse Oort to forschen (up hochdütsch seggt man „Feldforschung“ dorto) is he nich blot een Vadder von de Meckelborgsch Volkskunn, ne, ok för de von ganz Düütschland wurden un hett up disse Wies ok de hütige „Europäische Ethnologie“ ut de Kinnerschoh ruuthalt.

Wat man in dat Projekt finnen kann un woans dat maakt is

• All dat, wat upschräwen is, sall tosamenfat´t un upbewohrt warden

• Dat WossiDiA-Projekt is so, as dat maakt warden is, mihr wiert as de enzelten Parts

Grow geseggt, geiht dat darüm:

Zettelkästen  ( ( - -T-R-A-N-S-F-O-R-M-A-T-I-O-N - - ) )  WossiDiA

De Gewinn is:

• de Wossidloschen Sammlungen wurden nu so digitalisiert vörstellt, dat jedwerein, dee dat will, mit de Zettels arbeiten kann; bäder, as wenn he disse ut de Zettelkastens (taun Bispill) ruutsöken sall – he möt ok nich mihr lang´ reisen

• de Sammlung ward vör Schaden bewohrt

• man kann ok wat Nieges ruutkriegen, wenn de Schriften vergläken warden

Schräben Schrift ward up den Computer oewerdragen un ward so to ’ne niege Internetquell

Mit dit Projekt ward ton iersten Mal versöcht, 2,3 Millionen Schriftstücken bett trüch to ehr ierste Upteiknung för dat Projekt bruukbor to maken. Dormit dat allens inne Reihg kümmt, ward de niegste Technik, dee dat för so´n Vörhaben gifft, insett´t, denn „WossiDiA“ sall för jeden apen sien.

Worüm Parts ünnereinanner verbunnen warden sünd

Dat, wat Wossidlo in sienen Läben tosammendragen hett, hürt to de groten volkskunn´lichen Sammlungen in Europa. He hett jo ok allens, wat em wichtig wier, unnersöcht. Wat em sülben oder von sien Bidrägers to Uhren kamen is, hett he upschräben. Ditt Sammelgot is in de berühmten Zettelkastens trechtleggt un in sien Zettelwand upbewohrt. He hett oewer ok käken, wat anneruurts sammelt warden is, un hett ok dat upschräben un upnahmen. Ditt ganze Sammelgot tosamen mit de Korrespondenzen möt nun tosamenfat´t un för dat WossiDiA-Projekt trecht makt warden.

De Informatikers hebben dat nich licht hatt, denn se stünnen vör eenen groten Barg von Malessen, üm de välen nödigen Verwiesungen hentokriegen. Se hebben dat oewer schafft, un ruutkamen is, dat nu alle Lüüd, de dat willen, up ’ne ganz niege Oort mit Wossidlos Läbenswark arbeiten koenen.

Wat is nu in „WossiDiA“ to finnen?

De eenzelten Stücken sind:

• wat Wossidlo in Meckelborg up siene Reisen hürt un upschräben hett

• wat sien Bidrägers em schräben hebben un ok, wat Wossidlo jüm antwurt´t hett (de Korrespondenzen – ca. 50.000 Digitalisate)

• wat Wossidlo to dat „Mecklenburgisches Wörterbuch“ schräben hett, wat oewer to sien Läbenstied nich mihr farig worden is (ca. 400.000 Digitalisate)

• wat Hermann Teuchert mit sienen handschriftlichen Zettelkatalog för dat Book bruukt hett – Teuchert hett an dat Wark von Wossidlo wiererarbeit´t un to Enn bröcht (ca. 350.000 Digitalisate)

• wat Wossidlo annerwägens in Volkskunn´schriften ut anner Länner rutfunnen hett (ca. 600.000 Digitalisate)

Fief Stütten von´t Projekt

1. Wossidlos Sammlungen möten vor Verlurengahn und Verdarben bewohrt warden. Dorüm ward allens up Films bröcht, de minn´st 500 Johr hollen soelen un de in den´n „Oberrieder Stollen“, een Bargwark in´n Schwarzwald, wo Dütschlands bedüdendes Kulturgot uphägt, henbröcht un inlagert ward. Dit hett dat „Bundesamt für Bevölkerungsschutz und Katastrophenhilfe (BBK)“ betahlt.

2. Wat Wossidlo sik vör hunnert Johr för Schlagwüürd utdacht hett, üm sien Sammlungen, besünners de Zettels, in sien Kastenwand uptofinnen, reekt hüütigendaags nich mihr ut. Sei möten för WossiDiA oewerarbeit oder nie maakt warden. De „Deutsche Forschungsgemeinschaft / Wissenschaftliche Literaturversorgungs- und Informationssysteme (DFG / LIS)“ gifft dat Geld dorför.

3. Wenn „WossiDiA“ in de ganze Welt as een digitales Onlinearchiv to bruuken sien sall, möt ’ne niege Datenbank upbuugt warden. Se möt so angelegt warden, dat man licht an de Daten rankümmt un ok dormit arbeiten kann. Dorför möt se dat internationale Rägelwark upnähmen. Ok för disse Upgaw gifft de DFG/LIS Geld. Maken don dat Mitarbeiter von dat Wossidlo-Archiv un von dat Räkenzentrum von de Universität Rostock.

4. Studenten as Hülpslüüd maken dat, wat noch mit Handarbeit to don is. Disse Studenten warden ok von de DFG/LIS betahlt.

5. Nich toletzt hebben Lüüd ok ihrenamtlich wat to dat Gelingen bidragen. Ahn disse Lüüd, de von de „Gesellschaft zur Förderung des Wossidlo-Archivs (GWA)“ kamen sünd, wier „WossiDiA“ nich farig wurden. Johrelang hebben se flietig arbeit´t an dat Trechtmaken von de Wossidloschen Zettels (Paginierung und Nummerierung), dormit se in de Systematisierung wedderfunn warden koenen.